काठमाडौं । नेपाल चेम्बर अफ कमर्सका अध्यक्ष कमलेश कुमार अग्रवालले पूँजी बजारलाई थप सुदृढ, पारदर्शी र लगानीमैत्री बनाउन आवश्यक रहेको औंल्याउनुभएको छ। सिडिएस एण्ड क्लियरिङ लिमिटेड द्वारा आयोजित प्रस्तावित धितोपत्र अभौतिकीकरण कार्य सञ्चालन निर्देशिका, २०८२ सम्बन्धी मस्यौदामाथि आयोजित अन्तरक्रिया कार्यक्रममा विशिष्ट वक्ताका रूपमा बोल्दै उहाँले उक्त धारणा राख्नुभएको हो। निजी क्षेत्रको तर्फबाट आफ्नो धारणा राख्ने क्रममा उहाँले पूँजी बजार सुधारका लागि एकीकृत नीति आवश्यक रहेकोमा जोड दिनुभयो।
उहाँले विकासोन्मुख देश नेपालका लागि पूँजी बजार आर्थिक विकासको महत्वपूर्ण आधार भएको उल्लेख गर्दै यसले बचतलाई उत्पादनशील क्षेत्रमा परिचालन, उद्योग-व्यवसाय विस्तार, रोजगारी सिर्जना तथा विदेशी लगानी आकर्षणमा महत्वपूर्ण भूमिका खेल्ने बताउनुभयो। प्रस्तावित निर्देशिका बजारलाई जटिल बनाउने होइन, तरल, सुरक्षित र लगानीमैत्री बनाउने लक्ष्यका साथ परिमार्जन गर्नुपर्नेमा उहाँले जोड दिनुभयो।
अध्यक्ष अग्रवालले विगतमा लागू गरिएको दोहोरो आईएसआईएन (अन्तर्राष्ट्रिय धितोपत्र पहिचान नम्बर) प्रणालीका कारण एउटै कम्पनीका शेयरको फरक–फरक मूल्य कायम भई बजारमा सट्टेबाजी तथा मूल्य विकृति बढेको उल्लेख गर्नुभयो। यसले लगानीकर्तामा भ्रम र अविश्वास सिर्जना गर्नुका साथै बजार सूचकांक र कारोबारमा नकारात्मक प्रभाव परेको उहाँको भनाइ थियो। अन्तर्राष्ट्रिय अभ्यासअनुसार “एउटै कम्पनी, एउटै आईएसआईएन” को नीति अवलम्बन गर्नुपर्ने सुझाव उहाँले दिनुभयो।
उहाँका अनुसार संस्थापक र सर्वसाधारण शेयरबीचको विभाजनले शेयरको तरलता घटाउने, बोनस, हकप्रद तथा लाभांश वितरणजस्ता संस्थागत कार्यहरूमा प्राविधिक जटिलता बढाउने र नियामक निकायको अनुगमनमा कठिनाइ सिर्जना गर्ने समस्या देखिएको छ। साथै दोहोरो आईएसआईएन व्यवस्थाले पूर्ण अभौतिक (डिम्याट) प्रणाली, टी+२ सेटलमेन्ट, बजार निर्माता व्यवस्था (मार्केट मेकिङ) तथा डिजिटल स्वचालनजस्ता आधुनिकीकरणका प्रयासमा अवरोध पुर्याउन सक्ने उहाँले बताउनुभयो।
आपूर्ति संरचना सुधारका लागि संस्थापक शेयरमा अत्यधिक लक–इन अवधि तथा कूलिङ अवधिका कारण बजारमा शेयर आपूर्ति सीमित भई सट्टेबाजी बढ्ने अवस्था रहेको भन्दै उहाँले क्रमिक रूपमा निश्चित सीमा (जस्तै २० प्रतिशतसम्म) शेयर खुला गर्ने व्यवस्था गर्नुपर्ने सुझाव दिनुभयो। यसले बजारमा आपूर्ति सन्तुलन कायम गरी मूल्य स्थिरता ल्याउन सहयोग पुग्ने उहाँको धारणा थियो।
साथै अध्यक्ष अग्रवालले अन्तर्राष्ट्रिय अभ्यासबमोजिम कम्पनीका सञ्चालकहरूले पनि विशेष परिस्थितिबाहेक आफ्नो तोकिएको सिलिङभन्दा माथिको शेयर बिक्री गर्न पाउनुपर्ने बताउँदै यसले शेयरको आपूर्ति बढाउने र अन्य क्षेत्रमा लगानी प्रोत्साहित हुने धारणा राख्नुभयो।
निर्देशिका कार्यान्वयनअघि सरोकारवालासँग व्यापक परामर्श गरी नियामकीय प्रभाव मूल्याङ्कन गर्नुपर्नेमा जोड दिँदै उहाँले निजी क्षेत्रसँगको समन्वयले नीति कार्यान्वयनलाई प्रभावकारी र व्यवहारिक बनाउने विश्वास व्यक्त गर्नुभयो।
अन्त्यमा अध्यक्ष अग्रवालले पूँजी बजार सुधारका लागि सबै नियामक तथा सरोकारवाला निकायबीच समन्वय आवश्यक रहेको उल्लेख गर्नुभयो।
काठमाडौं । कवि सपना लामिछानेद्वारा लिखित कविताकृति ‘जिन्दगी एक यात्रा’ माथिको परिचर्चा तथा ‘क्याप्टेन रतन बहादुर लामिछाने पुरस्कार’ समर्पण समारोह भव्य र सभ्य रूपमा सम्पन्न भएको छ। साहित्य, कला र सम्मानको समिश्रण बनेको उक्त कार्यक्रम गरिमामय, सुसंस्कृत र स्मरणीय बनेको आयोजकले जनाएको छ।
कार्यक्रमलाई सफल बनाउन प्रत्यक्ष तथा अप्रत्यक्ष रूपमा सहयोग पुर्याउने सम्पूर्ण महानुभावहरूप्रति आयोजक संस्था सूचक प्रकाशन परिवारका अध्यक्ष दीपक भेटुवाल (दीपसागर)ले हार्दिक आभार व्यक्त गर्नुभएको छ।
समारोहमा प्रमुख अतिथिका रूपमा उपस्थित नेपाल प्रज्ञा प्रतिष्ठानका कुलपति भूपाल राईले कार्यक्रमको उद्घाटन गर्दै प्रेरणादायी मन्तव्य व्यक्त गर्नुभएको थियो। उहाँको उपस्थितिले कार्यक्रमलाई विशेष गरिमा प्रदान गरेको अध्यक्ष भेटुवालले उल्लेख गर्नुभयो।
त्यसैगरी सोही प्रतिष्ठानका सदस्य सचिव डा. धनप्रसाद सुवेदीले कृतिमाथि गहन समीक्षा प्रस्तुत गर्दै ‘जिन्दगी एक यात्रा’लाई समकालीन जीवनदर्शनको मार्मिक अभिव्यक्ति भएको बताउनुभयो।
समारोहकै अवसरमा **‘क्याप्टेन रतन बहादुर लामिछाने पुरस्कार’**बाट वरिष्ठ गायक आनन्द कार्कीलाई सम्मान गरिएको थियो। उहाँलाई हार्दिक बधाई व्यक्त गर्दै आयोजकले उहाँको गरिमामय उपस्थितिप्रति आभार प्रकट गरेको छ।
कार्यक्रममा शुभकामना मन्तव्य दिने अतिथिहरूमा गीतकार संघ नेपालका पूर्व अध्यक्ष चुडामणि देवकोटा, नेपाल राष्ट्र बैंकका पूर्व गभर्नर चिरञ्जीवी नेपाल, १२ खरीका पत्रकार राजेश खनाल, बौद्ध अध्येता एवं सम्यक् सन्देशका सल्लाहकार श्यामलाल चित्रकार तथा कार्यक्रमका सभापति, स्रष्टा पदयात्रा नेपालका महासचिव गंगा प्रसाद भेटवाललगायतको उपस्थिति रहेको थियो।
स्वर्गीय क्याप्टेन रतन बहादुर लामिछानेका सुपुत्रीहरू रचयिता लामिछाने र रीति लामिछाने तथा सुपुत्र स्वस्तिक लामिछानेको आत्मीय उपस्थिति र सहयोगप्रति पनि विशेष आभार व्यक्त गरिएको छ।
कार्यक्रम व्यवस्थापनमा खादा अर्पणतर्फ सहयोग पुर्याउने गंगा खतिवडा र अप्सरा केसीलाई विशेष धन्यवाद दिइएको छ। त्यस्तै पत्रकार जयराम बिडारी, पत्रकार डिबि पराजुली तथा कुशल कार्यक्रम सञ्चालक नवीन पल्लवको योगदानलाई उच्च सम्मान गरिएको आयोजकले जनाएको छ।
अन्त्यमा, आफ्नो बहुमूल्य समय निकालेर कार्यक्रममा उपस्थित भई कला, साहित्य, सिर्जना र सम्मानको यो गरिमामय क्षणलाई सार्थक बनाइदिने सम्पूर्ण साहित्यप्रेमी, शुभेच्छुक तथा सञ्चारकर्मी मित्रहरूप्रति अध्यक्ष दीपक भेटुवाल (दीपसागर)ले हृदयदेखि नै धन्यवाद व्यक्त गर्नुभएको छ।
नेपाली सांगीतिक क्षेत्रमा देशभक्तिको भावनाले भरिएको नयाँ गीत सार्वजनिक हुने तयारीले माहोल तातेको छ। एक्टिभ ईन्टरटेनमेन्टको प्रस्तुति रहने बहुप्रतीक्षित गीत “म झुक्न दिन्न मेरो देशको झण्डा” अब औपचारिक रुपमा दर्शकमाझ आउँदैछ। लामो समयको पर्खाइपछि सार्वजनिक हुन लागेको यस गीतले राष्ट्रप्रेम, स्वाभिमान र एकताको सशक्त सन्देश दिने अपेक्षा गरिएको छ।
गीतका शब्द चर्चित गीतकार डि.बि. पराजुलीले सिर्जना गरेका हुन् भने स्वरमा रुपक डोटेल र मेनुका राईले जीवन्तता दिएका छन्। संगीत संयोजनमा बिजेन्द्र नौबागेको मेहनत रहेको छ भने एरेन्जरका रूपमा सुनिल परियारले विशेष योगदान दिएका छन्।
म्युजिक भिडियोमा पनि कलाकारहरूको सशक्त उपस्थिति रहनेछ। मुख्य कलाकारका रूपमा बिजेन्द्र नौबागे, सैलेश ठकुरी, सुसिला तामाङ, पबित्रा अर्याल (पबि) देखिनेछन्। त्यस्तै, सामाजिक अभियन्ताहरू लिला खनाल, एकराज सुबेदी, दिपिका खनाल, रोज बहादुर तामाङ, सुनिता थापा, के.बि. खाती, लक्ष्मण श्रेष्ठ, कल्पना श्रेष्ठ, जित बहादुर हमाल, उत्तम घिमिरे र सुन्दर खनाल अतिथि कलाकारका रूपमा सहभागी भएका छन्। बाल कलाकारहरू मन्दिप सिलवाल, स्मिथ विक्रम पराजुली, फियोना ठकुरी, ईज्ना ठकुरी र आयन थापाले पनि भिडियोमा विशेष आकर्षण थप्नेछन्।
यस गीतको नृत्य निर्देशन तथा निर्देशन दिपेश एस.के.ले गरेका हुन् भने सम्पादन प्रेम शर्मा पौडेलले गरेका छन्। छायांकन केशव अधिकारी र कृष्ण बहादुर महराले सम्हालेका छन्। मेकअप आर्टिस्ट प्रमिला सुनाम, मिक्सिङ डिका गुरुङ, कलरिस्ट जोन राई तथा रेकर्डिस्ट मदन नेपाली (सुफिक्स)को समेत महत्वपूर्ण भूमिका रहेको छ।
गीतको रेकर्डिङ एरिका रेकर्डिङ स्टुडीयोमा सम्पन्न गरिएको हो। निर्माण कार्यमा फोटो नेपाल, माईती लिक्वीड डिसवास, पत्रकार तथा सामाजिक अभियन्ता राजन थापा, मिलन कुमार दोङ (अमेरिका) र युवा व्यवसायी रुपेश तामाङ (काभ्रेपलाञ्चोक)को साथ रहेको छ।
गीतको लोकार्पण कार्यक्रम २०८२ फागुन ७ गते साँझ ४ बजे सिन्की भान्छाघरमा आयोजना हुने भएको छ, जुन स्टारमलसँगै अवस्थित छ।
देशभक्तिले भरिएको यो सिर्जना सार्वजनिक भएपछि नेपाली सांगीतिक क्षेत्रमा नयाँ उत्साह थपिने विश्वास गरिएको छ। राष्ट्रप्रेम र स्वाभिमानलाई केन्द्रमा राखेर तयार गरिएको “म झुक्न दिन्न मेरो देशको झण्डा” ले दर्शक–श्रोताको मन जित्ने मात्र होइन, देशप्रतिको भावना झन् प्रगाढ बनाउने अपेक्षा गरिएको छ।
काठमाडौँ । नुवाकोट बेलकोटगढी–१३ दाङ्मै स्थायी घर भई हाल अमेरिकामा बसोबास गर्दै आएका धार्मिक समाजसेवी रूपक लोहनीको बहुप्रतीक्षित भजन “शिव ताण्डव स्तोत्रम” सार्वजनिक भएको छ। भक्ति, आस्था र आध्यात्मिक भावनालाई सशक्त ढंगले प्रस्तुत गरिएको यस स्तोत्रमले सार्वजनिक भएसँगै दर्शक–श्रोतामाझ विशेष चर्चा बटुल्न थालेको छ।
आराध्यदेव भगवान् शिवप्रति समर्पित यस स्तोत्रममा नेपालका चर्चित धार्मिक स्थलहरूको मनमोहक दृश्य समेटिएको छ, जसले भिडियोमा थप आध्यात्मिक गरिमा र भावनात्मक गहिराइ प्रदान गरेको छ। गायक अशोक पाण्डेको संगीत तथा सशक्त स्वरले स्तोत्रमलाई प्रभावशाली बनाएको छ भने कोरसमा मनीष रञ्जन बराल र शिव पारायण स्वरमा शिवराज जोशीको सहभागिताले प्रस्तुति अझै गुञ्जायमान बनेको छ।
पण्डित राजकुमार आचार्यको शब्द संयोजनमा तयार भएको यो भजनलाई निर्देशक सुनिल क्षेत्रीले भव्य ढंगले पर्दामा उतारेका छन्। भिडियोमा सुनिल क्षेत्री, रूपक लोहनी, प्रशान्त सुन्दास र पूर्णिमा विश्वकर्माको अभिनय देख्न सकिन्छ, जसले कथा र भक्ति भावलाई जीवन्त बनाएको छ।
संगीत संयोजन नारायण डंगाल, मिक्सिङ–मास्टरिङ चन्द्र चौधरीले गरेका छन् भने ‘Acoustic Studio’मा रेकर्ड गरिएको हो। भिडियोतर्फ छायांकन दुर्गा पौडेल र नवराज उप्रेतीले गरेका हुन्। कोरियोग्राफी एबी, प्रशान्त, रितेश र पूर्णिमाले संयुक्त रूपमा गरेका छन् भने सम्पादन तथा कलरिङ अमृत चापागाईंले गरेका छन्। मेकअप आर्टिस्टका रूपमा सबिना गुरुङ र रोजिना श्रेष्ठको योगदान रहेको छ।
आध्यात्मिक सन्देश, सशक्त प्रस्तुति र प्रविधिको सन्तुलित प्रयोगले सजिएको “शिव ताण्डव स्तोत्रम” भजनले धार्मिक संगीतप्रेमीमाझ नयाँ ऊर्जा र श्रद्धाको अनुभूति दिलाउने अपेक्षा गरिएको छ। विशेषगरी विदेशमा बसेर पनि नेपाली धर्म–संस्कृतिलाई प्रवर्द्धन गर्ने रूपक लोहनीको यो प्रयासलाई धार्मिक तथा सांगीतिक क्षेत्रले सकारात्मक रूपमा लिएको छ।
प्रवास । ६ फेब्रुअरी, शुक्रबारका दिन गौरिशंकर सिन्धुपाल्चोक कुर्दिस्तान समाजको आयोजनामा मन्जुश्री संवत २८६२ औँ ता/ल्हो अर्थात् घोडा वर्षको अवसरमा सोनाम ल्होछार तथा ग्याल्पो ल्होसार संयुक्त रूपमा भव्य बृहत् सांस्कृतिक कार्यक्रम सम्पन्न भएको छ।
उक्त कार्यक्रममा प्रमुख अतिथिको रूपमा प्रवासी नेपाली एकता समाजका अध्यक्ष सलम सिंह लामा ज्युको गरिमामय उपस्थिति रहेको थियो। साथै, नेपालबाट आमन्त्रित अतिथि कलाकार, अत्यन्तै लोकप्रिय सेलो गायक प्रदीप लामा ज्युले आफ्नो अमूल्य समयका बाबजुद समाजको निमन्त्रणालाई सहजै स्वीकार गरी कार्यक्रममा सहभागिता जनाउनु भएकोले कार्यक्रमको वातावरण थप उत्साहपूर्ण र रोचक बनेको थियो।
गौरिशंकर सिन्धुपाल्चोक कुर्दिस्तान समाजले प्रवासमा रहेर पनि आफ्नो मौलिक भाषा, धर्म, कला तथा संस्कृतिको संरक्षण र प्रवर्द्धनलाई उच्च प्राथमिकता दिँदै आएको उल्लेख गरिएको छ।
कार्यक्रम सफल पार्न आर्थिक, भौतिक, प्रत्यक्ष, अप्रत्यक्ष तथा विभिन्न रूपमा सहयोग गर्नु हुने व्यक्ति तथा संघ–संस्थाहरू, संस्थाका पदाधिकारीहरू, सहयोगी मनका धनी महानुभावहरू, निमन्त्रणालाई स्वीकार गरी उपस्थित अतिथि महानुभावहरू, पत्रकार साथीहरू, स्थानीय कलाकारहरू तथा सम्पूर्ण संस्कार, संस्कृति एवं ल्होछार प्रेमी महानुभावहरूप्रति गौरिशंकर सिन्धुपाल्चोक कुर्दिस्तान समाजको तर्फबाट हार्दिक धन्यवाद व्यक्त गरिएको छ।
साथै, समाजले आगामी दिनहरूमा पनि यस्तै माया, साथ र सहयोगको अपेक्षा गरिएको जनाएको छ।
काठमाडौं । कलाकार ,सर्जकहरुलाई बिभिन्न बिधामा अवार्ड,समाजसेवी तथा मिडियाकर्मीहरुलाई सम्मान प्रदान गर्दै चौथो राष्ट्रिय एक्टिभ म्युजिक अवार्ड–२०८२ भव्य कार्यक्रमका बीच सम्पन्न भएको छ । कार्यक्रममा विभिन्न विधामा योगदान पुर्याएका कलाकार, सर्जक, सञ्चारकर्मी तथा समाजसेवीलाई सम्मान र अवार्ड प्रदान गरिएको थियो । कार्यक्रमको सञ्चालन दीपेन्द्र शेन शाहीले गरेका थिए भने सभापतित्व सर्जक, कलाकार, मोडल तथा एक्टिभ म्युजिक प्रा.लि.का प्रवन्ध निर्देशक बिजेन्द्र नौबागेले गरेका थिए । प्रमुख अतिथिका रूपमा पूर्व मन्त्री पर्शुराम वाईबा तामाङ उपस्थित थिए । कार्यक्रममा बिरुवा गाउँपालिका अध्यक्ष सूर्य कुँवर, बिरुवा गाउँपालिका वडा नं ६ का वडा अध्यक्ष कृष्ण बहादुर क्षेत्री,वरिष्ठ अधिवक्ता तथा कलाकार कृष्णप्रसाद ढुंगाना, मुक्तिनाथ विकास बैंकका कम्पनी सचिव डन्डपानी ढकाललगायत विशिष्ट अतिथिको उपस्थिति रहेको थियो । कार्यक्रमा गीतकार देवेन्द्र शारु मगर, पत्रकार मोहन कार्की, पत्रकार सुमन श्री पौडेल,माईण्ड प्लसका प्रवन्ध निर्देशक नवीन पल्लव लगायत विशेष अतिथि तथा गीत,संगीत क्षेत्रमा लागेका कलाकारहरूको उल्लेखनीय सहभागिता थियो । कार्यक्रममा निर्णायकको भुमिकम वरिष्ठ लोक तथा दोहोरी गायक माधव भण्डारी,चर्चित मोडल संचिता शाही,संगीतकार मदन नेपाली (सुफिक्स),गीतकार सामना शाह,संचारकर्मी पर्वतराज घिमिरे रहेका थिए । कार्यक्रमका सभापति बिजेन्द्र नौबागेले स्वागत मन्तव्य व्यक्त गर्दै कला, संगीत र सर्जनशीलताको सम्मानका लागि यस्ता कार्यक्रमले सकारात्मक ऊर्जा प्रदान गर्ने बताए । प्रमुख अतिथि पर्शुराम वाईबा तामाङले पानसमा दीप प्रज्वलन गरी कार्यक्रमको औपचारिक उद्घाटन गरेका थिए । उद्घाटनपछि ‘म त नेपाली’ बोलको स्वदेशगानमा त्रिशक्ति कला केन्द्रका कलाकारहरूले आकर्षक स्वागत नृत्य प्रस्तुत गरेका थिए । त्यसपछि विभिन्न चरणमा सम्मान तथा अवार्ड वितरण कार्यक्रम अघि बढाइएको थियो । आधुनिक गायक सीडी विजय अधिकारी र नृत्य निर्देशक दिपेश एस के लगायतका कलाकारहरूको सांगीतिक प्रस्तुति र नृत्यले कार्यक्रमलाई थप रङ्गीन बनाएको थियो । कार्यक्रममा विभिन्न क्षेत्रका व्यक्तित्वलाई कला सम्मान प्रदान गरिएको थियो। संगीत साधक सम्मान–२०८२ वरिष्ठ गीतकार तथा संगीतकार राजकुमार बगर, पत्रकार सम्मान–२०८२ सानुकाजी श्रेष्ठ, सदावहार गायिका सम्मान–२०८२ शर्मिला गुरुङ, दशक सम्मान–२०८२ शिव हमाल, सञ्चारकर्मी सम्मान–२०८२ डी.बी. पराजुली, छायाँकार सम्मान–२०८२ केशव अधिकारी, खेलाडी सम्मान–२०८२ संजोक परियार, पत्रकार सम्मान–२०८२ शंकर रोका, समाजसेवी सम्मान–२०८२ यमबहादुर जी.सी. र नवराज शर्मा, निर्देशक सम्मान–२०८२ दिनेश डाँगी, संगीत संयोजन सम्मान–२०८२ सुनिल परियार, कोरियोग्राफर सम्मान–२०८२ दीपेश एस.के., भिडियो सम्पादन सम्मान–२०८२ ईनिस बुढाथोकी, सञ्चारकर्मी सम्मान–२०८२ विनोद नेपाली, कला सम्मान–२०८२ विनोद कार्की, बालकलाकार आरिया शाही र मन्जली तामाङ तथा समाजसेवी कृष्णबहादुर विकलाई सम्मान प्रदान गरिएको थियो ।
त्यसैगरी विभिन्न विधामा अवार्ड वितरण गरिएको थियो । सर्वोत्कृष्ट आधुनिक गीत गायक अवार्ड–२०८२ सीडी विजय अधिकारी (गीतस् ‘चाहिदैन न्याय मलाई’), सर्वोत्कृष्ट आधुनिक गायिका मेनुका राई (‘हेल्लो हाई नमस्कार’), सर्वोत्कृष्ट लोक तथा दोहोरी नवगायक प्रोत्साहन अवार्ड सुन्दर खनाल (‘ढुङ्गे धारा पानी’), सर्वोत्कृष्ट लोक तथा दोहोरी गायिका अवार्ड संगम लामिछाने (‘ए गौरी’), जूरी अवार्ड बिमला सुनार (‘नजिक नजिक सरन’), सर्वोत्कृष्ट लोक तथा दोहोरी नवगायक हरि सुनार (‘जान्छौं लाउरेको साथैमा’), सर्वोत्कृष्ट लोक दोहोरी भिडियो मोडल महिला पवित्रा अर्याल (‘खतम बनायो मलाई’), सर्वोत्कृष्ट आधुनिक भिडियो मोडल टीका जैसी (‘लाली जवान’), लोक आधुनिक गीत गायक प्रोत्साहन अवार्ड इन्द्र बस्याल (‘आमा’), चाडपर्व गीत गायिका सबिता परियार (‘गावै रमाइलो’), पुर्बेली गीत गायक सुबिन चाम्लिङ (‘चौतारिमा बसौँला’), आधुनिक गीतकार कमला प्रधान (‘तारा टुटी झरे सरि’), म्युजिक भिडियो निर्देशक बिनोद सुन्दास (‘रुनुको के अर्थ’), आधुनिक संगीतकार बिराज ढुंगाना (‘सधैं भरि’), पब्लिक च्वाइस संगीतकार राजेन्द्र बजगाई (‘पुतली’), पब्लिक च्वाइस गीतकार भीष्मराज फुलारा (‘पुतली’), लोक तथा दोहोरी लयसंकलन नन्दु परियार (‘पोखरा पृथ्वी चोकैमा’), शब्दसंकलन सुनिता रसाइली (‘टुट्यो भने मन’), भिडियो मोडल रमेश विश्वकर्मा (‘लाली जवान’), जूरी मोडल किरन स्याङ्बो तामाङ (‘तिम्रो लागि’), ध्वनि रेकर्डिस्ट सागर बाजुराली (‘तल्लो बाटो’), लोक आधुनिक गायक राजेश बर्देवा, लोक तथा दोहोरी गायक चन्द्र बी.सी. र जूरी अवार्ड नारायण राईलाई प्रदान गरिएको थियो ।
कार्यक्रमको अन्त्यमा प्रमुख अतिथिले कलाकारहरूको योगदानको प्रशंसा गर्दै नेपाली संगीत क्षेत्रको विकासमा यस्ता अवार्ड कार्यक्रमले महत्वपूर्ण भूमिका खेल्ने बताए । आयोजकले सहभागी सबैलाई मायाको चिनो वितरण गर्दै कार्यक्रम सफलतापूर्वक सम्पन्न भएको घोषणा गरेका थिए । कार्यक्रमलाई मुक्तिनाथ बिकास बैंक लिमिटेड ,गरिमा बिकास बैंक लिमिटेड ,नेपाल बैंक लिमिटेड ,हिमालयन बैंक लिमिटेड , सिटिजन बैंक लिमिटेड ,राष्ट्रिय बाणिज्य बैंक लिमिटेड , नबिल बैंक लिमिटेड ,एभरेष्ट बैंक लिमिटेड , महालक्ष्मी बिकास बैंक लिमिटेड ,माछापुछ«े बैंक लिमिटेड ,नेपाल टेलिकम ,कान्तिपुर डेन्टल हस्पिटल ,बसुन्धारा , वेलकम ईन्टरनेशनल प्रा.लि.,सामाखुसी ,शोदिप ट्राभल एण्ड टुर्स प्रा.लि.,ठमेल ,वेदव्यास स्कुल एण्ड कलेज सामाखुसी ,तुलसा आल्मुनियम एण्ड युपिभिसी फेब्रिकेशन प्रा.लि. सितापाईला ,शुलभ फर्निचर हाउस प्रा.लि. कलंकी, बिष्पोक टेलरिङ एण्ड बुटिक सेन्टर बागबजार , आठबिस नगरपालिका वडा नं ६ ,कर्णाली प्रदेश, दैलेख ,बिरुवा गाउँपालिका कार्यालय,गण्डकी प्रदेश,स्याङ्जा ,बिरुवा गाउँपालिका वडा नं. ६ ,गण्डकी प्रदेश,स्याङ्जा, हरिनास गाउँपालिका कार्यालय,गण्डकी प्रदेश,स्याङ्जा,कालिगण्डकी गाउँपालिका कार्यालय,गण्डकी प्रदेश,स्याङ्जा,आँधीखोला गाउँपालिका कार्यालय,गण्डकी प्रदेश,स्याङ्जा,फेदिखोला गाउँपालिका कार्यालय,गण्डकी प्रदेश,स्याङ्जा, अर्जुनचौपारी गाउँपालिका कार्यालय,गण्डकी प्रदेश,स्याङ्जा,चापाकोट नगरपालिका कार्यालय, गण्डकी प्रदेश,स्याङ्जा, पुतलीबजार नगरपालिका कार्यालय, गण्डकी प्रदेश,स्याङ्जा,वालिङ नगरपालिका कार्यालय, गण्डकी प्रदेश,स्याङ्जा, भिरकोट नगरपालिका कार्यालय, गण्डकी प्रदेश,स्याङ्जा, गल्याङ नगरपालिका कार्यालय, गण्डकी प्रदेश,स्याङ्जा, मिट लाईफ ईन्सुरेन्सको सहकार्य र प्रायोजन रहेको थियो ।
कार्यक्रमको मिडिया पार्टनरको रुपमा सारा खबर डटकम,तुफान न्यूज डटकम,शान्ति नेपाल टि भि एच डि ,मिलाप न्यूज ,जनआकाश मिडिया,मध्यान्न दैनिक,जनसवाल दैनिक रहेका थिए ।
रामेछाप । ओखलढुङ्गातर्फ जाँदै गरेको एक यात्रुबाहक बस रामेछाप जिल्लाको बेनीघाट–त्रिवेणी क्षेत्रबाट तामाकोशी नदीमा खसेको छ। दुर्घटना केहीबेर अगाडि भएको हो। घटनास्थलमै रहेका अनेरास्ववियु रामेछापका संयोजक गोपाल थोकरले जिक्तेन न्युजसँग कुरा गर्दै दुर्घटनापछि केही शव नदीमा तैरिँदै बगिरहेको देखिएको जानकारी दिएका छन्। यद्यपि, हालसम्म मृतक तथा घाइतेको यकिन संख्या पुष्टि हुन सकेको छैन। दुर्घटनाको जानकारी पाउनासाथ स्थानीयवासी, नेपाल प्रहरी र सशस्त्र प्रहरीको टोली घटनास्थलमा पुगेर उद्धार कार्यमा खटिएको छ। तामाकोशी नदीको बहाव तीव्र रहेकाले उद्धार कार्य चुनौतीपूर्ण बनेको जनाइएको छ। बस सडकबाट कसरी नदीमा खस्यो भन्ने विषयमा अनुसन्धान सुरु गरिएको छ। बसमा कति यात्रु सवार थिए भन्ने विवरण समेत संकलन भइरहेको प्रहरीले जनाएको छ। घटनास्थलमा भीडभाड बढ्दै गएपछि सुरक्षाकर्मीले स्थिति नियन्त्रणमा राख्दै उद्धारलाई प्राथमिकता दिएका छन्। थप विवरण आउनासाथ जिक्तेन न्युजले अपडेट गर्ने जनाएको छ।
काठमाडौं । बालप्रतिभाको क्षमता, सिर्जनशीलता र आत्मविश्वासलाई उजागर गर्ने उद्देश्यले आयोजना गरिएको ‘नेपाल चाइल्ड स्टार–२०८२’ ले नयाँ पुस्तामा कला, आत्मविश्वास र नेतृत्व क्षमताको विकासतर्फ सकारात्मक सन्देश दिएको छ। कार्यक्रमले बालबालिकालाई आफ्नो प्रतिभा प्रस्तुत गर्ने मात्र नभई व्यक्तित्व निर्माण र भविष्यप्रति आत्मविश्वासी बन्न प्रेरित गर्ने सशक्त मञ्चका रूपमा आफूलाई स्थापित गरेको छ।
देशका विभिन्न स्थानबाट सहभागी भएका बालप्रतिभाहरूले गायन, नृत्य, अभिनय, स्टेज प्रस्तुतीकरण र अन्तरक्रियामार्फत आफ्नो क्षमता प्रदर्शन गरेका थिए। उनीहरूको उत्साह, मेहनत र सिर्जनशीलताले दर्शक तथा अभिभावकलाई निकै प्रभावित बनाएको थियो। कार्यक्रमले बालबालिकाभित्र लुकेका कला र सम्भावनालाई पहिचान गरी त्यसलाई प्रोत्साहन गर्ने वातावरण सिर्जना गरेको आयोजकको भनाइ छ।
प्रतियोगितामार्फत बालबालिकामा अनुशासन, समय व्यवस्थापन, सहकार्य र नेतृत्व क्षमताको विकास भएको देखिएको छ। सहभागी बालप्रतिभाहरूले स्टेजमा आत्मविश्वासका साथ प्रस्तुतीकरण गर्दै आफ्नो व्यक्तित्व र सोचलाई खुलेर अभिव्यक्त गरेका थिए, जसले उनीहरूमा सकारात्मक ऊर्जा थपेको अभिभावकहरूले बताएका छन्।
विशेषगरी यस्ता कार्यक्रमले बालबालिकालाई सानै उमेरदेखि सार्वजनिक मञ्चमा बोल्ने, प्रस्तुत हुने र प्रतिस्पर्धालाई सकारात्मक रूपमा लिन सिकाउने भएकाले उनीहरूको भविष्य निर्माणमा महत्वपूर्ण भूमिका खेल्ने विश्वास गरिएको छ। निर्णायक मण्डलले पनि प्रतिभासँगै आत्मविश्वास, अनुशासन र नेतृत्व गुणलाई प्राथमिकतामा राखेर मूल्यांकन गरेको जनाएको छ।
आयोजकका अनुसार ‘नेपाल चाइल्ड स्टार–२०८२’ केवल उपाधि जित्ने प्रतियोगिता मात्र नभई बालबालिकाको समग्र व्यक्तित्व विकास गर्ने अभियान हो। यसले नयाँ पुस्तालाई सिर्जनशील सोच, सकारात्मक दृष्टिकोण र नेतृत्व क्षमतासहित अघि बढ्न प्रेरणा दिएको छ।
कार्यक्रमले बालबालिकाभित्र लुकेका सम्भावनालाई उजागर गर्दै उनीहरूलाई आफ्नो लक्ष्यप्रति केन्द्रित हुन हौसला प्रदान गरेको छ। यसले अभिभावक र समाजलाई पनि बालप्रतिभाको पहिचान र प्रोत्साहनमा थप जिम्मेवार बन्न सन्देश दिएको सहभागीहरूको भनाइ छ।
समग्रमा, ‘नेपाल चाइल्ड स्टार–२०८२’ नयाँ पुस्तालाई कला, आत्मविश्वास र नेतृत्व क्षमतासहित अघि बढ्न प्रेरित गर्ने प्रभावशाली मञ्चका रूपमा स्थापित भएको छ, जसले भविष्यमा अझ धेरै प्रतिभाशाली बालबालिकालाई उजागर गर्ने अपेक्षा गरिएको छ।
देशभरबाट सहभागी भएका बालप्रतिभाहरूबीच भएको प्रतिस्पर्धामा ज्योति बम्जन र अयान तिवारीले मुख्य उपाधि जित्दै कार्यक्रमको केन्द्रबिन्दु बने। उनीहरूले आफ्नो आत्मविश्वास, प्रस्तुतीकरण, व्यक्तित्व र प्रतिभाका आधारमा निर्णायक मण्डलको मन जित्न सफल भएका हुन्।
प्रतियोगितामा मुख्य उपाधिसँगै विभिन्न विधामा उत्कृष्ट प्रदर्शन गर्ने बालबालिकाहरूलाई उप–उपाधिहरू प्रदान गरिएको थियो। कार्यक्रममा यानि पाण्डेयाले “Best Smile”, कमाक्षी श्रेष्ठले “Best Walk” र स्तुति खड्काले “Best Discipline” उपाधि जितिन्। त्यसैगरी जियाना बम्जनलाई “Time Punctual” र आर्याश्री पाण्डेयलाई “Best Attitude” उपाधि प्रदान गरियो।
मुख्य विजेता ज्योति बम्जनले “Best Costume” उपाधि समेत हात पारिन् भने उर्बिका रुपाखेतीले “Best Communication Skill” जितिन्। आरोही कटवालले “Best Stage Presence”, रुबी लिम्बुले “Photogenic” र अलिना थापाले “Best Confidence” उपाधि प्राप्त गरे।
त्यस्तै, शिवांशु जंग न्यौपानेले “Intelligence”, पुजन कटवालले “Best Expression” र अयान तिवारीले “Best Personality” उपाधि जिते। कौसल बलायरलाई “Most Talent” घोषणा गरिएको थियो।
कार्यक्रमको आयोजन आदर्श इन्टरटेन्मेन्ट हाउस ले गरेको हो भने प्रमुख प्रायोजक ग्लोबल टच एजुकेशन कन्सल्टेन्सी रहेको थियो ।
केटीतर्फ स्तुति खड्का प्रथम उपविजेता र आरोही कटवाल द्वितीय उपविजेता घोषित भइन् । त्यस्तै केटातर्फ सिवान्सु जंग न्यौपाने प्रथम उपविजेता र कौशल बलायर द्वितीय उपविजेता बने ।
कार्यक्रममा उत्कृष्ट अभिभावक सम्मान सरस्वती थापा लाई प्रदान गरिएको थियो, जसले बालबालिकाको उज्ज्वल भविष्य निर्माणमा अभिभावकको योगदानलाई सम्मानित गरेको आयोजकले जनाएको छ ।
पछिल्लो समय मिडिया लगायत स्टेज कार्यक्रमहरुमा निकै रुचाईएका प्रतिभाशाली युवा कार्यक्रम प्रस्तोता दिपेन्द्र शेन शाहीले संयोजन तथा सन्चालन गरेको कार्यक्रमका प्रमुख अतिथि वरिष्ठ रेडियोकर्मी तथा पत्रकार हेम सुवेदी रहेका थिए । रेडियो आहा १०४.५ मेगाहर्जका व्यवस्थापक निर्देशक आकृति सुवेदी विशेष अतिथिका रूपमा सहभागी थिइन् ।
प्रतियोगिताको मूल्यांकन मिस्टर नेपाल तथा अभिनेता समर्पण जंग कार्की, गायक तथा गीतकार दिनेश क्षेत्री, गायक सागर सुनार तथा डा.मीना प्रधान सम्मिलित निर्णायक मण्डलले गरेका थिए ।
यस अवसरमा मिडियाकर्मी डि.वि. पराजुली लाई विशेष सम्मान प्रदान गरिएको थियो भने सम्मानित मोडेल तथा अभिनेता सुमन अधिकारी लाई पनि सम्मान गरिएको थियो ।
कार्यक्रमका आयोजकका अनुसार प्रतियोगिताको मुख्य उद्देश्य बालबालिकाभित्र लुकेका प्रतिभा, आत्मविश्वास, अनुशासन र व्यक्तित्व विकासलाई उजागर गर्नु हो। विभिन्न चरणमा गायन, नृत्य, अभिनय, स्टेज प्रस्तुतीकरण र अन्तरक्रियामार्फत बालप्रतिभाहरूले आफ्नो क्षमता प्रस्तुत गरेका थिए, जसले कार्यक्रमलाई थप रोचक र प्रतिस्पर्धात्मक बनाएको थियो।
उपाधि विजेता ज्योति बम्जन र अयान तिवारीले आफ्नो सफलताप्रति खुशी व्यक्त गर्दै परिवार, शिक्षक र समर्थकहरूप्रति आभार व्यक्त गरेका छन्। उनीहरूले यस उपलब्धिलाई आगामी यात्राको प्रेरणा मानेर अझ उत्कृष्ट प्रदर्शन गर्ने प्रतिबद्धता व्यक्त गरे।
नेपाल चाइल्ड स्टार–२०८२ ले नयाँ पुस्तामा कला, आत्मविश्वास र नेतृत्व क्षमताको विकासमा सकारात्मक सन्देश दिएको छ। कार्यक्रममा सहभागी सबै बालप्रतिभाहरूको उत्साहजनक प्रस्तुतीकरणले अभिभावक र दर्शकहरूलाई निकै प्रभावित पारेको थियो।
काठमाडौं । सुनसरी क्षेत्र नं ४ बाट स्वतन्त्र उम्मेदवारी दिएकी यमुना के.सी. को हुन ? उनले किन सुनसरीबाट उम्म्ेदवारी दिइन् ? भन्ने बिषय यतिबेला चासोको बिषय समेत बनेको छ । रोल्पामा जन्मिएर समाजिक सेवामा १५ वर्षदेखि निरन्तर लागि रहेकी यमुना के.सी. संग गरेको कुराकानीको आधारमा तयार गरिएको यो रिपोर्ट रोल्पाली चेली फाउन्डेसनकी अध्यक्ष यमुना के.सी. विगत दुई दशकदेखि निरन्तर सामाजिक सेवामा सक्रिय रहँदै आएकी प्रेरणादायी महिला अभियन्ता हुनुहुन्छ । रोल्पा जस्तो विकट भूभागमा जन्मिएर हुर्किएकी के.सी. ले समाजका दुःखी, पीडित तथा पिछडिएका वर्गको वास्तविक अवस्था नजिकबाट बुझ्दै सामाजिक सेवाको यात्रा सुरु गर्नुभएको हो । स्वास्थ्य, शिक्षा, खानेपानी र मानवीय सेवाका क्षेत्रमा उहाँले उल्लेखनीय योगदान र्पुयाउँदै आउनुभएको छ । दुर्गम बस्तीहरूमा स्वास्थ्य सेवाको पहुँच र्पुयाउने उद्देश्यले उहाँले काठमाडौंबाट चिकित्सक टोली लिएर निःशुल्क स्वास्थ्य शिविर सञ्चालन गर्दै आउनुभएको छ । विशेषगरी ॐ समाज डेण्टल अस्पतालसँगको सहकार्यमा १९० पटकभन्दा बढी स्वास्थ्य शिविर सञ्चालन गरी हजारौँ नागरिकलाई प्रत्यक्ष स्वास्थ्य सेवा उपलब्ध गराउन सफल हुनुभएको छ । स्वास्थ्य सेवासँगै सामाजिक संरचना निर्माणमा पनि उहाँको योगदान उल्लेखनीय छ । रोल्पामा वृद्ध–बृद्धाका लागि वृद्धाश्रम, दाङमा असहाय तथा बेसहारा बालबालिकाका लागि बालआश्रम स्थापना गर्नुका साथै मठ–मन्दिर, पाटी–पौवा, तटबन्ध निर्माण तथा बृद्धाश्रमहरूमा नगदसहित खाद्यान्न सहयोग गर्दै आउनुभएको छ । सप्तरी र रामेछापमा मन्दिर निर्माण तथा संरक्षणमा पनि उहाँको सक्रिय भूमिका रहेको छ । काम गर्दा भावनाभन्दा योजनामा विश्वास गर्ने अभियन्ताका रूपमा चिनिनुहुने यमुना केसी.ले कुनै पनि अभियान अघि बढाउनु अघि सरोकारवालासँग परामर्श गर्दै आएको बताइन्छ । करिब १५ वर्षदेखि अभियन्ता राजन थापासँग सहकार्य गर्दै उहाँले सामाजिक अभियानलाई निरन्तरता दिँदै आउनुभएको छ । यिनै योगदानको कदरस्वरूप उहाँले देशका विभिन्न स्थानबाट सयौँ सम्मान तथा कदरपत्र प्राप्त गरिसक्नुभएको छ । सामाजिक सेवामा गरेको दीर्घ योगदानकै आधारमा यमुना के.सी. हाल सुनसरी क्षेत्र न.४ बाट प्रतिनिधि सभा सदस्य पदका लागि स्वतन्त्र उम्मेदवारका रूपमा चुनावी मैदानमा उत्रिनुभएको छ। उहाँको चुनाव चिह्न ‘मुसा’ रहेको छ । स्थानीय स्तरमा उहाँको इमान्दारिता, समर्पण र सेवाभावको व्यापक प्रशंसा हुँदै आएको छ । एक वृद्ध आमाले “तपाईं त काठमाडौंमै बसेर राजनीति गर्न सक्नुहुन्थ्यो, किन सुनसरी ?” भनी सोध्दा उहाँले दिएको जवाफ अहिले जनस्तरमा चर्चा बन्दै गएको छ। यस्तो भन्नू हुन्छ यमुना के।सी “काठमाडौंमा धेरै विकास भइसकेको छ, तर सुनसरीमा विकास गर्न अझै धेरै बाँकी छ । जहाँ आवश्यकता बढी छ, त्यहीँबाट म आफ्नो जिम्मेवारी सुरु गर्न चाहन्छु । मैले राजनीति सेवाका लागि रोजेकी हुँ, पदका लागि होइन ।”
काठमाडौं । सौन्दर्य क्षेत्रमा सिप, अनुशासन र लामो अनुभवलाई प्राथमिकता दिँदै निलु लामाले नयाँ युनिसेक्स पार्लर ‘निलु ग्लाम एण्ड रि–ट्रिट’ सञ्चालनमा ल्याएकी छिन् ।
बौद्धस्थित तीनचुलीमा सञ्चालन गरिएको उक्त लेडिज एण्ड जेन्ट्स पार्लरको उद्घाटन वरिष्ठ सौन्दर्यविद् सुष्मा महराले गरिन् । उद्घाटन कार्यक्रममा नेपालको नम्बर वान युनिसेक्स पार्लर फेसियल हाउसकी सञ्चालक तथा प्रबन्ध निर्देशक समेत रहेकी महराले निलुको मेहनत र धैर्यताको उच्च प्रशंसा गरिन् ।
‘धेरैले तालिम लिनेबित्तिकै पार्लर खोल्न खोज्छन् । त्यसो गर्दा धेरै पक्षको प्रयोगात्मक ज्ञान र अनुभवको कमी देखिन्छ,’ सौन्दर्यविद् महराले भनिन्, ‘सिप सिकिसकेपछि केही समय कुनै पार्लरमा काम गरेर अनुभव प्राप्त गरी अनि मात्रै पार्लर सञ्चालन गर्दा सेवाको गुणस्तर र ग्राहकको विश्वास दुवै कायम हुन्छ । निलुले फेसियल हाउसमै सिकेर, इन्टर्न गरेर र लामो समय काम गरेर दक्ष बनेपछि मात्रै पार्लर सुरू गरेकी छिन्, जसले ग्राहकलाई सन्तुष्ट सेवा दिन सक्छिन् ।’
महराले निलुले दक्ष भएर ब्युटी पार्लर सञ्चालनमा ल्याएकोमा खुसी व्यक्त गर्दै धेरै–धेरै बधाई तथा सफलताको शुभकामना पनि दिइन् । आफूमा भएको मेहनत र धैर्यतालाई कायम राख्दै अघि बढ्न उनले सुझाव समेत दिएकी छिन् ।
निलु फेसियल हाउसकी विद्यार्थी हुन् । उनले फेसियल हाउसबाट सौन्दर्यसम्बन्धी औपचारिक तालिम लिई, त्यही संस्थामा इन्टर्नशिप तथा लामो समयसम्म काम गर्दै व्यावहारिक अनुभव हासिल गरेपछि मात्रै आफ्नै लेडिज एण्ड जेन्ट्स पार्लर सञ्चालनमा ल्याएकी हुन् । तालिमसँगै व्यावहारिक अभ्यासलाई प्राथमिकता दिनुले आफूलाई पेशागत रूपमा दक्ष बनाएको उनको भनाइ छ ।
फेसियल हाउसले सञ्चालन गरेको ब्युटी एकेडेमी सीटीईभीटीबाट सम्बन्धन प्राप्त संस्था हो, जहाँबाट हालसम्म हजारौँले सौन्दर्यसम्बन्धी सिप हासिल गरी स्वदेशमै रोजगारी तथा स्वरोजगारमा आबद्ध भएका छन् । कतिपयले वैदेशिक रोजगारीमा समेत राम्रो अवसर पाउँदै आएका छन् ।
ब्युटी उद्योग पछिल्लो समय रोजगारी सिर्जना, महिला उद्यमशीलता प्रवर्द्धन र स्वरोजगारको महत्वपूर्ण माध्यमका रूपमा विकास हुँदै गएको छ । छालाको प्रकार अनुसारको उपचार, आधुनिक सौन्दर्य प्रविधिको प्रयोग, सरसफाइ र ग्राहक सुरक्षालाई प्राथमिकतामा राख्ने दक्ष ब्युटिसियनको माग बढ्दो छ ।
अनुभव, सिप र सेवाको गुणस्तरलाई केन्द्रमा राखेर सुरू गरिएको ‘निलु ग्लाम एण्ड रि–ट्रिट’ युनिसेक्स पार्लरले स्थानीय क्षेत्रमा गुणस्तरीय सौन्दर्य सेवा प्रदान गर्ने विश्वास लिइएको छ ।
अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
