सुनसरी । नेपाली कांग्रेसको १५औँ महाधिवेशनअन्तर्गत सुनसरी क्षेत्र नम्बर ४ को नेतृत्व चयनका लागि मतदान भइरहेका बेला विवाद उत्पन्न भएको छ।
वर्तमान क्षेत्रीय सभापति ऐयुब अन्सारीले मतदानस्थलमा रहेको मतपेटिकामा लात हानेर हिँडेको आरोप लागेको छ। मतपेटिकामै लात हानेपछि घटनाले मतदानस्थलमा केहीबेर तनावको अवस्था सिर्जना भएको बताइएको छ।
उक्त घटनाप्रति उपस्थित प्रतिनिधिहरूले असन्तुष्टि जनाउँदै मतदानजस्तो संवेदनशील निर्वाचन प्रक्रियामा यस्तो गतिविधि हुनु आपत्तिजनक भएको बताएका छन्। उनीहरूले घटनाको निष्पक्ष छानबिन गरी आवश्यक निर्णय लिन निर्वाचन समितिसमक्ष माग गरेका छन्।
घटनापछि मत र मतपेटिकालाई मतदान अधिकृत तथा निर्वाचन समितिले सुरक्षित नियन्त्रणमा लिएको जनाइएको छ। त्यसपछि अहिले पुनः मतदान प्रक्रिया सञ्चालन भइरहेको बताइएको छ।
घटनाबारे निर्वाचन समितिले छानबिन गरी आधिकारिक धारणा सार्वजनिक गर्नुपर्ने मागसमेत उठेको छ।
